政情：死要面趕搬竇 煲呔曾奴役工人

添馬艦新政府總部工程延誤，煲呔曾政府卻為咗面子及趕入伙，搞到工人通宵達旦趕工，更將特首辦提早搬竇，以配合國務院副總理李克強來港，加插一項為添馬艦揭幕嘅大龍鳳。煲呔曾今日結束休假，或會興高彩烈咁吹口哨行去新辦公室返工，不過，我哋收到可靠消息報料，新特首辦好多工程未妥當，實在係「金玉其外，敗絮其中」。煲呔曾死要面，結果又係工人遭殃，有工人家屬就向我哋投訴，呢兩個月來佢老公一日假都冇放過，捱到不似人形！

工人趕餐死 暴瘦30磅

工人家屬咁扯火，令件事似足孟姜女哭崩長城嘅現代版，只知追求假大空目標嘅煲呔曾，同懶理小民死活嘅秦始皇有乜分別？呢位工人家屬不忍老公為咗趕建添馬艦，向我哋投訴，呢兩個月來老公日日夜夜趕工，近排更加晚晚做到午夜先收工，期間飯都無時間食，體重驟減三十磅不在話下，而且病到死都無時間睇醫生。呢位女士大鬧煲呔曾，所謂人心肉做，點解煲呔曾為咗趕住入伙，趕及喺立法會新大樓宣讀施政報告，就要收買工人人命。

正當工人做餐死時，煲呔曾就結束六日休假，今日第一次去添馬艦嘅新特首辦返工。咁特首辦嘅環境又點呢？有消息人士爆料，實情內裏仲未搞掂，所以咪唔畀大家入去睇囉！據講，特首辦呢幾日仍然在趕工當中，即使煲呔曾自己間房，啲傢俬都係前日先至送到添馬艦，唔單止煲呔曾間房，連佢老婆曾鮑笑薇間房亦都係。

消息仲話，煲呔曾喺過去一連兩個星期日，都走入仲喺地盤嘅添馬艦視察，不時指指點點，要求多多，講完之後，咪又係啲工人死做爛做。枉政府仲口口聲聲話要做良好僱主，淨係睇呢個添馬艦工人嘅情況，已經聽者心酸，你估家吓仲係秦始皇為咗修建奢華阿房宮，肆意奴役民眾嘅年代咩？