政情：搞搞政：Bernard寸煲呔曾唔節能

全球暖化日漸加劇，環保節能係大勢所趨，但煲呔曾領導嘅夕陽政府冇樣得，最近為咗可以喺添馬艦新政府總部辦公威威，同埋喺立法會新大樓宣讀施政報告，要班工人狂加班猛吸沙塵都在所不惜。可持續發展委員會主席Bernard陳智思尋日喺大氣電波爆料，話曾向環境局局長邱騰華查詢過新政府總部嘅節能效益，對方話新總部必定符合大廈能源效益嘅最高標準喎！

由口惠而不實嘅高官作出嘅承諾，信不信由你喇！Bernard喺言談間亦暗寸煲呔曾比較少「輕裝」上陣，之後講講下又刺中煲呔曾嘅死穴，話政府搞慳電膽補貼又搞唔成，仲令到大家日後對「補貼」呢個字好小心同好敏感，因為香港好多嘢嘅持份者都係大財團。

Bernard最後苦口婆心，建議政府帶頭做好環保節能工作，例如喺政府擁有嘅商業大廈、公屋先行改變模式做好環保節能工作，到時真係慳到錢時大家都會跟住做。呢番說話表面上係獻計，潛台詞就係寸煲呔曾一直冇做好環保節能囉！