政情：建仔冧商界焗蘇錦樑剝牙

由做副局長、「署男」以至最近終於坐正商務及經濟發展局局長嘅蘇錦樑，咁耐以嚟只有一個任務，就係推銷《競爭法》，但點搞都係一鑊泡，畀商界鬧爆，甚至威脅要佢撤回草案，早前西環仲主動出手叫工商界支持《競爭法》。本來蘇錦樑已經衰到貼地，但咁都不特止，連自己友都唔畀面佢。邊個自己友？咪就係佢所屬嘅政黨建仔囉！

競爭法刪威嚇措施

話說建仔早排已經靜雞雞、私下掟咗個競爭法嘅修改方案畀政府。呢個方案可以話集各家大成，除咗大堆學者畀意見，連四大商會都睇過話冇問題。商界之所以咁受落，因為建仔將所有最有威嚇性嘅措施剝走晒。例如刪除私人訴訟；規管門檻亦改由定額方式，唔會再以市場所佔嘅百分比作決定。

換言之，就算有人壟斷晒成個行業，只要營業額去唔到一定數目，都唔使受到法例規管，呢個亦係一班中小企聽到後，最嗒得杯落嘅措施。

建仔將成條《競爭法》改成無牙老虎，無非都係想向商界示好，因為佢哋心知極大部分中小企都對《競爭法》有好大反對聲音，而建仔亦手握唔少商界票源，無論喺直選定功能組別，都發揮好大影響力。一旦條例原封不動通過，對商界會好大傷害，到時實將罪名賴落建仔身上，話佢朝中有人都辦唔到事，令建仔失威。

香港中小企數目多如繁星，為咗唔想得失呢班龐大票源，建仔惟有焗住向蘇錦樑開刀，逼佢硬食呢個無牙老虎方案，仲講明呢個方案已經係退無可退，政府一係接受，一係睇住建仔投反對票，絕不讓步。咁即係要蘇錦樑自己剝牙啫！

到現時為止，政府根本唔夠票，只係得白鴿黨同公文袋撐現時嘅方案，仲講明政府唔可以再跪低讓步，睇嚟今次蘇錦樑剝唔剝牙都死。