諮詢閃閃縮縮 機局弄巧反拙

醜婦終須見家翁，香港國際機場興建第三條跑道公眾諮詢下月結束，話就話係諮詢，但工程究竟對環境會有乜嘢影響，你唔知，我唔知，大家都矇查查。喺環保團體催促之下，機管局終於公開工程顧問報告，可惜，唔睇猶自可，一睇嚇一跳。

報告話，如果第三條跑道如期喺二○二三年啟用，到二○三○年，航班升降量同空氣污染物排放會同步上升，比○七年雙雙增加一倍。仲有吖，預料國寶級嘅中華白海豚過半數會因為跑道填海工程而被禍及，都咪話唔驚。

咁關鍵嘅環評資料，公眾諮詢期過咗一大半至公布，唔怪得航空專家同立法會議員大鬧機管局冇誠意咯。佢哋更警告話，如果唔切實解決環境問題，興建第三條跑道嘅大計好難得到市民支持。

叮！公眾諮詢冇具體數據做參考，就等於玩空對空，齊齊廢噏，盞嘥時間。呢，有環保組織調查發現，超過七成被訪者從未聽過機管局話機場擴建方案對空氣質素有乜影響。市民對實際情況一無所知，根本無從判斷應唔應該支持方案，咁嘅諮詢仲有乜意義？

所謂公眾諮詢，居然好似唧牙膏咁，畀人鬧一鬧就唧一唧，真係搞笑。唔怪得有人質疑當局刻意玩神秘，唔知仲有幾多嘢收收埋埋唔畀人知。

話時話，興建第三條跑道工程龐大，涉及一千三百億元投資，分分鐘變成全球最貴嘅跑道，而且對環境造成好大影響，公眾諮詢必不可少。問題係，既然要諮詢，一定要有足夠透明度，公開所有資料，點可以遮遮掩掩o架？咁同假諮詢有乜分別？

講開假諮詢，其實係港府嘅慣技，大家見怪不怪咯。夕陽政府弱雞到冇朋友，喺市民環保意識高漲嘅今時今日，興建新跑道唔只耗資龐大，而且需要大規模填海，本來就有好大爭議，如果諮詢再閃閃縮縮，甩甩漏漏，隨時適得其反，拖慢項目進度，甚至被迫擱置都似，你話係咪搞笑呢。

咪話太一叮唔提醒吖，一個綜援婆婆已經可以輕易推翻港珠澳大橋嘅環評報告，機管局今次諮詢做得咁核突，第三條跑道隨時起飛變跪低，一啲都唔出奇o架。叮！