政情：任達華籲罰醉駕者賠樓

任達華尋日出席一個汽車活動時話，之前太太琦琦送咗一架名車畀佢，今次佢有意再買車，由家中司機負責駕駛，佢又大讚司機好好，從來都唔會醉駕。之後，佢提到因醉駕而被罰停牌半年嘅洪天明女友周家蔚，佢好言相勸：「佢飲咗酒就唔應該揸車，佢可以打畀我，我叫司機去接佢。唔好話藝人，所有人飲咗酒都唔應該揸車，周街都係的士，點解唔搭的士？好方便。」佢話以前有朋友飲醉酒，佢都會開車送佢哋返屋企，但慘被對方喺車上嘔到一團糟，所以依家佢每次都會先走。

佢強調唔係針對任何人，但認為停牌幾個月至半年嘅刑罰過輕，提議要重罰至起到阻嚇作用，佢話：「應該要罰停牌兩年，同罰十萬。」向來主意多多嘅佢又戲言：「一係就罰層樓做公益，咁就個個都唔敢醉駕，因為依家嘅樓巿咁高，個個都想保住個頂。如果真係咁，我諗天明都唔敢畀女友飲咗酒揸車，冇咗層樓，唔通叫大哥（洪天明爸爸洪金寶）畀層樓佢住咩！」