政情：工聯會兩新人王浮面

下年就係立法會換屆選舉，工聯會內部規定旗下兩名立法會勞工界議員，只可以做一屆四年咁多，之後有能力嘅就轉戰地區直選，唔多掂嘅就要迅速收山，讓番呢兩個工聯會贏硬嘅議席畀新人參選。該會早前揀咗八位新人作重點培訓接勞工界支棒，最近開始浮出兩名熱門人選，分別係工聯會元老陳婉嫻嘅愛將，同現任理事長吳秋北嘅嫡系。

嗰兩位熱門人選就係工聯會屬下文職及專業人員總會（文專總會）嘅副會長王吉顯同陳慶生，佢哋兩個專業背景濃厚，而且參與工會工作多年，加上年紀唔算大，切合晒工聯會近年銳意年輕化同專業化嘅目標。咪以為兩人名不經傳，查實王吉顯都玩過直選，佢喺○八年就曾經代表工聯會喺九龍東出選立法會，但就排喺現任立法會議員黃國健同副會長嫻姐後面，結果無緣入局。陳慶生履歷同樣唔差，從事金融工作超過二十年，擁有博士學位，近年仲讀埋心理學添。

但依家仍存有變數，其中最大隱憂就係兩人都嚟自同一個屬會，工聯會旗下其他工會大佬會唔會接受，真係要傾過至知。