政情：搞搞政：崩盤恐慌孖陳派定心丸
全球大股災，香港都唔能夠幸免，尋日股市插水，恒生指數一度跌咗一千二百幾點，跌穿二萬一千點水平收市，搞到人心惶惶，睇唔通後市。
向來投資有道嘅立法會保險界代表陳健波分析，凡事有好有壞，佢認為尋日嘅大跌市同美國政府將要收緊開支同歐洲債務危機有關。佢話，雖然美國收緊開支嘅影響可能會持續一段時間，但同時令美國失去加息條件，事關美國一加息，香港樓市同股市同樣受到影響，若然短期內唔加息，大家可以少咁樣擔心。
亞洲金融集團主席陳有慶都認同尋日跌市同美國有關，由於市況前景唔明朗，佢話唔少揸住大批貨嘅人，都會沽出部分套現，諗住可以安全啲，結果令市場有咁大波動，但佢相信對亞洲區影響唔大。聽過兩位高人之言，大家會唔會安心啲呢？
設計對白