政情：渣打請員工食hard sell早餐

渣打上半年業績連續第九年創新高，而香港區重奪最賺錢地區寶座，管理層亦非常識做，為咗答謝員工，尋日朝早請咗中環總行同國金兩邊嘅同事食醒神早餐，就係星巴克嘅藍莓鬆餅同綠茶咖啡嘞。係咪覺得呢個早餐配搭好特別呢？咪就係因為「藍+綠」＝渣打品牌顏色囉，慰勞員工都要配合集團形象。

銀行當然係以客為先，渣打香港個人銀行業務主管Mary禤惠儀話，下半年動用超過一億港元，強化全線分行網絡，希望未來能夠開多十間八間分行，不過就呻搵心水舖位好難，想喺靚位開分行並非易事。

政府派六千蚊喺呢個月二十八號首輪登記，Mary話已有專責小組籌備，又要增加人手，依家已招聘緊兼職員工。渣打香港行政總裁阿Ben洪丕正就話，自己會拎六千蚊，但仲未諗點用喎。

洪丕正（中）同禤惠儀（左）慰勞員工都要配合集團形象。