政情：黃碧雲勢做炮灰

專業會議立法會九龍西議員「鼠王芬」梁美芬，因為替補機制「選民懲罰論」搞到人氣同形象大插水，白鴿黨早就吼實佢喺九龍城區議會黃埔東選區嘅議席，仲打算派出黃碧雲狙擊，希望乘勢趕走鼠王芬，但呢個如意算盤分分鐘打唔響。

區議會選舉一向係泥漿摔角，唔係你死就我亡，原本黃碧雲因早前參加終極普選聯盟令人氣一度急升，白鴿黨喺近幾個月以嚟，亦一直培育佢喺當區做嘢，下下都針對鼠王芬嚟砌，開始時白鴿黨都係威係勢，黃碧雲頻頻落區同街坊打招呼，風頭一時無兩，但點知原來啲街坊唔係好受佢嗰套。

支持度仲低過袁彌明

白鴿黨做咗個區內民調，發現黃碧雲冇乜街坊識、支持度徘徊喺低位之餘，唔單止被鼠王芬遠遠拋離，仲低過有意加入戰圈狙擊白鴿黨嘅選民力量袁彌明，情況唔多樂觀。

喺咁嘅形勢下，白鴿黨有可能勒住黃碧雲叫佢唔好選，費事最尾輸太多好肉酸。據悉，黨內有份搞選舉部署嘅人，都知黃碧雲今仗輸梗，但當初諗住派佢出戰，係志在為下年立法會選舉鋪路，白鴿黨高層認為，如果黃碧雲喺區議會已經輸成幾條街，咪講話鋪路，倒米就真。

另一邊廂，選民力量高舉狙擊白鴿黨轉軚支持政改方案，要白鴿黨「票債票償」，若果黃碧雲得票仲低過袁彌明嘅話，即係證明選民對白鴿黨嘅負面印象未減退。

雖然黨內一致睇淡，但該黨立法會九龍西議員涂謹申仍力撐黃碧雲上戰場，佢話鼠王芬依家形象插水，學者形象不但被質疑，投票立場比一般左派更「左口左面」，而以黃碧雲嘅學者背景，絕對有力挑戰喎。