中港媽咪罵戰 仇內切忌升溫

中港大戰！講緊嘅，唔係書展國產宅男女神同土炮𡃁模鬥賣寫真鬥到上心口，亦唔係京官同曾蔭權隔空過招為「公務員治港」蓋棺定論，而係一段近日網上熱爆短片，大字標題寫住：港鐵車廂罵戰（大陸女人VS香港媽媽）。

短片喺東鐵線車廂拍攝，事源香港媽媽兩名女兒喺兩人座位排排坐，內地媽媽見人細位大，於是將仔仔都逼埋上去坐，香港媽媽不忿出言阻止，就係咁觸發起一場中港罵戰。兩位母親極速化身「戈師奶」，互相向對方噴火，期間內地媽媽仲粗口橫飛，拎晒啲人體器官出嚟鬧，雙方愈罵愈狠，幾乎大打出手。

小學雞當街罵父母惹人側目，今次怪獸媽媽大戰媽媽怪獸，一樣激起網民群情洶湧，紛紛熱論誰是誰非。即係咁，計太一叮話齋，一隻手掌拍唔響，其實兩位火爆媽咪都有唔啱，而且，佢哋嘅失禮言行，仲會對下一代有好壞嘅影響添。

首先，喺公眾場合高聲嗌交，旁若無人，等如示範潑婦罵街，教壞下一代。其次咯喎，呢樣緊要咯，隨時關乎民族大義、國家統一，喺一國之內中港媽咪為子女搶位而互相指罵，事件完全凸顯咗兩地嘅文化差異同利益矛盾。雖然未必會演變成類似新疆維漢種族衝突嘅動盪局面，但係萬一損害港人同內地同胞嘅情誼，影響中港融合，一樣茲事體大！

太一叮咁講唔係杞人憂天㗎，車廂罵戰短片曝光，網民唔只聲討內地媽媽，仲一竹篙打一船人，批評內地人「搞到香港cheap晒」，港人「仇內」情緒一觸即發。大家唔好唔記得，挪威大屠殺兇手都係因不滿新移民而動殺機咋，歷史上排外主義嘅教訓多不勝數。

話時話，隨着個人遊開放，內地同香港嘅交往愈嚟愈頻繁，兩地同胞嘅衝突近年就愈見尖銳。搶奶粉、搶床位生仔、搶買豪宅推高香港樓價、搶戲飛睇《3D肉蒲團》……搞到香港民間創作嘅「蝗蟲歌」一度熱爆網絡，依家連搭港鐵都要搶位坐，睇嚟問題都幾棘手。

嗱，學者就講得啱嘞，中港民間衝突難以避免，短期內都無法消弭，惟有雙方互讓互諒。內地客要尊重香港文化，香港人亦要有待客精神，多加包容。港府旅遊宣傳片都教啦，好客香港，感受一流吖嘛！

至於港府咯喎，梗係要快快同中央傾吓，解決涉及兩地嘅民生問題啦，好似內地孕婦來港產子咁。香港回歸祖國大家庭，萬一兩地同胞做唔到親上加親，反而變咗閂埋門打交，咁就有失國體啦，叮！