政情：徐靖雯冷眼看o靚模互數

貝安琪同大陸模特兒Jenny徐靖雯尋日出席apm「潮夏海底藝術宮殿」活動，推廣海洋保育嘅重要，兩人都春風滿面，原來感情生活各自各精彩。Jenny早前同追求者到海洋公園玩，而貝安琪亦大方公開戀情，佢話：「依家拍緊拖，今年開始拍，對方係中國人，做生意。」咁過咗試用期未，有冇諗住結婚？佢話：「無諗，仲係蜜月緊，我同佢識咗好耐，係青梅竹馬，媽咪（劉香萍）都識佢，仲好鍾意佢添！應該唔會閃電結婚。」另外，向來喜愛水上活動嘅佢，對自己身材感滿意，更試過喺德國友人家裸泳，但就怕尷尬，唔敢喺公眾沙灘裸泳。

Jenny就話有留意動漫節啲o靚模，大讚佢哋可愛之餘，笑言見佢哋經常互數對方整容而感覺好搞笑，但佢對整容之風大表反對，佢話：「個個整到眼鼻一模一樣，冇咗自己特點，我覺得天然好啲。我問過一啲男生，大部分人都鍾意女仔自然，我從來冇諗過整容，因為我初入行時，風氣比較保守。」