政情：CY班底陸續浮面？
身兼多項公職嘅市區重建局主席張震遠，尋日喺市建局飯局上被問及對特首候選人嘅睇法，佢話好認同應優先處理房屋、貧富懸殊同長者福利問題，認為邊個做特首都需要面對，又話：「目前嘅疑似候選人中，只有梁振英（CY）發表咗意見，認同係需要解決，佢嘅意見好值得參考。」
張震遠又認為梁振英完全符合國務院港澳辦主任王光亞開出嘅特首條件，仲大讚佢係特首嘅適合人選；又呼籲其他疑似候選人盡快就三個議題表態。咁高調硬銷好友，唔通張主席已經被招攬做助選團要員？定抑或梁振英嘅班底陸續浮面？
另外，張震遠又罕有咁帶埋十七歲嘅細仔張緒德到場見世面。喺英國讀書嘅緒德啱啱放暑假返港，第一次陪爸爸返工，佢話覺得市建局嘅工作好有意義，不過會否繼承父業就言之尚早，後年考大學嘅佢打算讀化學，同讀數出身嘅爸爸一樣愛好理科。
張震遠（左）帶埋細仔張緒德（右）到市建局飯局見世面。