政情：搞搞政：議員訪日憂畀人擺上枱
前排講過，日本外務省自掏腰包，請三位立法會議員睇食物安全，食物安全及衞生事務委員會班委員對呢個免費日本團興致勃勃，除咗主席「肥仔張」張宇人之外，兩個名額由五人爭奪，尋日喺委員會會議上抽籤，結果人民力量議員黃毓民同白鴿黨嘅李華明中選，佢哋仲搞埋替補機制，一旦臨時有人去唔到，就由富貴黨議員方剛頂上。
俗語有云：邊有咁大隻蛤乸隨街跳？委員李國麟憂慮，日本方面借呢個團抽水，大肆宣揚香港議員去完都冇事，呼籲大家度定返港如何向公眾交代。換言之，即係驚畀人擺上枱做生招牌。
肥仔張都有同感，決定出發前問定食物安全中心意見同埋向食品入口商收風，謀定而後動，了解吓佢哋去到應該睇乜嘢。而返港後隨即寫番份報告外，亦可能開記招分享喺日本嘅所見所聞。
設計圖片及對白