政情：煲呔曾fb假諮詢網民鬧爆

煲呔曾就施政報告做諮詢嘅facebook專頁尋日開檔，旋即畀逾半百網民留言鬧爆。網民「新安洲」話「八個字：意見接受，態度照舊」下刪粗口數字；仲有「Kevin Li」嘅「冇諮詢到唔緊要，最緊要認」；「胡國生」嘅留言更直接：「假諮詢；等收工！」自不然又有人叫佢早啲落台算數。

網民「李家傑」就嘲諷煲呔曾「諮詢阿爺啦……唔好諮詢我」，網民「蛇王威」好有創意咁話「改『上亞厘畢道』做上阿爺嗰道算啦」，真係抵死啜核。

有啲網民就顯得激動好多，好似「Adi Chan」大鬧「曾蔭權有咩可以幫助香港ga」，「Sing Tsang」則自行為粗口消音，佢留言「市民＿你，公務員unlike你」，加上行政會議成員以及一眾問責高官各懷鬼胎，所以「我都唔知繼續＿你好定話你慘好定覺得你自作孽好」。

再睇吓網民「Peter Wong」嘅留言「我想問：諮詢完畢後，有幾多成的意見是真真正正寫在施政報告中？」簡直一針見血！