政情：藺常念領狂牛隊贏金融盃
由靈獅控股董事總經理藺常念親身帶領嘅「狂牛隊」（由不同金融圈業界組成）又贏波喇！一年一度嘅「第6屆金融界精英籃球總決賽」，今屆賽事經過連番激鬥，上周六終於打到決賽，卒之由狂牛隊再次冧莊，以三十四分比二十七分戰勝恒生銀行。
贏波咁開心，難怪藺Sir笑到四萬咁口啦，當晚佢仲即刻拉大隊去慶功宴添，而且仲得到其老闆靈獅控股行政總裁黃偉康到場撐狂牛。
呢個「金融盃」已經打咗六年，由最初「小貓三、四隻」變成今日有十二間金融機構組隊加入，相信藺Sir一定付出唔少心血同汗水。「好似今年就有交行、海通國際、時富金融隊加入，佢哋嘅實力都好強，所以今年大家每場波都打得好辛苦，要贏冠軍變得更加難上加難，但有競爭先有進步，所以明年我會繼續搞比賽。」
身為領隊的藺常念又捧盃，自然牙擦擦地豎起大拇指。