政情：搬竇逼作先鋒 黃公公變吸塵機

仲記得商務及經濟發展局常任秘書長「黃公公」黃灝玄早前出席廠商會嘅活動時，做咗局長蘇錦樑嘅替死鬼，畀班會董就競爭法嘅問題插到飛起，相隔冇耐，佢仲做埋爛頭蟀添！

眾所周知，添馬艦立法會新大樓嚟緊八號就係交吉嘅死線，但內部裝修仲未完工，四處可見電線外露，連電子投票系統都未裝好，班立法會議員呱呱叫，話搞唔掂就唔搬。

其實，喺側邊嘅以門常開設計嘅新政府總部都係一樣，四處沙塵滾滾，有啲通道仲未開，但煲呔曾就罔顧班公務員嘅安全，商務及經濟發展局工商及旅遊科尋日仲率先搬入添馬艦。原先工商科位處金鐘太古廣場嘅辦事處租約期滿，令佢哋唔知有幸定不幸，可以成為吸塵先鋒。

下屬摷口罩遮住自己

所屬部門搬入新屋，黃公公尋日執到正一正，晨早坐座駕去到添馬艦，立即展現招牌露齒笑容，單手插袋昂然步入大堂，佢形容喺新竇返工好高興，大家都曾經搬過屋，搬去新辦公室冇乜唔適應，仲話佢自己嘅辦公室冇問題，一入去就可以即刻做嘢。佢仲話，雖然有啲小地方要執漏，但唔擔心同事安全或令同事成吸塵機。一句講晒就係冇問題，之後佢仲慢慢嘟卡入閘，全程任影唔嬲，以身體示範畀大家睇，呢個新竇有幾好。

雖然黃公公為搬竇傾力演出，硬挺新政府總部大樓冇問題，可惜賣力演出嘅似乎只得佢，而佢啲下屬就冇佢咁好演技，唔少人行到新大樓附近，立即摷番個口罩出嚟遮住自己，到底係唔想上鏡抑或唔想吸塵，真係佢哋自己先知。

老實講，尋日所見，添馬艦唔少地方仲係被布包住，擺明未裝修完，喺嗰度返工唔吸塵就假，班員工帶定口罩返工都係自保啫！