生果金玩殘長者 笨官僚癡癡呆呆

長者患腦退化症有得醫，好似光纖之父高錕咁，不知幾咁精靈。之但係，夕陽政府一旦證實腦退化，咁就棘手咯，唔係話一定無得救嘅，只係醫番都嘥藥費咁解囉。

港府病徵多籮籮，好似高官周不時口部失禁，講錯嘢激起民憤；又好似曾蔭權每次講樓價都語無倫次，呢啲都係腦退化症嘅特徵。政策方面，生果金政策自相矛盾，就更加係港產官僚病情惡化嘅有力證據添啦。

現時嘅生果金政策點樣自相矛盾呢？問題就多咯，數到天光都數唔晒，今日淨係講一樣，就係限制申領人每年至少留港六十日嘅僵化規定。

嗱，政黨調查結果係咁講嘅，香港八成老人都無考慮返內地退休，其中最大顧慮之一，就係唔想放棄攞緊嘅政府津貼，包括生果金。所以咯喎，若然政府撤銷生果金留港限制，當中兩成六人即刻回心轉意，考慮返內地定居頤養天年。

從以上調查清楚見到，港府施政真係極之矛盾。成日話驚香港人口老化，一直束手無策，但係另一方面，又強逆民意對生果金加設留港限制，畫地為牢困住班老人家死守香港。何只腦退化，直頭係作繭自縛嘅大笨蛋。

由生果金留港限制，亦清楚睇到癡呆港府嘅邏輯係幾咁紊亂不堪。移居海外遠地嘅香港居民，人人獲派六千蚊，返鄰近內地定居嘅老人家若然要攞一千蚊生果金，就要設下門檻，港府究竟係歧視老人，定係歧視內地先？嗱，是但一瓣都會得罪中南海班老人家，到時堂堂特區政府又被京官隔空訓誡，真係好鬼肉酸㗎！

仲有呀，同生果金一樣咁抵鬧嘅強積金，當局都可以恩恤為由，研究放寬提早取款啦，點解港產官僚就唔可以恩恤生活捉襟見肘嘅老人家，全面撤銷留港限制呢？港府咁樣施政，又係咪邏輯混亂、自相矛盾呀？

當然啦，留港限制最自相矛盾、最為諷刺之處，梗係要七老八十嘅公公婆婆長途跋涉中港兩頭騰啦。生果金用意敬老，反而變虐老，明明老如松柏身壯力健，都被港府玩到殘。

如果港產官僚唔想被人告虐老，或者唔想被人質疑患上腦退化打爛飯碗，咁就快啲檢討生果金。仲要全面制訂長者政策，令公公婆婆老有所養，唔係成日被公公婆婆去鵝頸橋底打小人，唔傻都打到你變癡呆，叮！