政情：何倍倩比華利山遇明星
「恒生新抱」何倍倩上月初遠赴美國視察環境，為十月喺美國比華利山開店做準備，一向鍾意睇美國電視劇集嘅佢，喺比華利山發現星蹤處處，但佢笑言自己並非追星族，所以冇要求合照，佢話：「始終好多電影會喺比華利山取景，佢哋會順路行吓街，所以成日見到啲明星出入，希望到時我舖頭開咗會過嚟幫襯吓啦。」
佢創立嘅護膚品牌Zensation原定九月喺當地開舖，依家押後至十月試業，十二月舉行開幕酒會，屆時將會邀請美國知名明星出席，名單待定。美國之行，佢特別訂咗部座駕代步方便出入，點知部車附有天窗，令一向怕曬嘅佢，經常用紙地圖遮擋住天窗，路過嘅途人都投以奇異目光。佢話，回港後發覺全家包括囝囝、老公甚至工人都病倒，佢要淪為「阿四」照顧家人，幸好依家全家都已經康復，但就輪到佢病倒。
何倍倩上月初赴美國視察環境，為開店做準備。