政情：任亮憲追撞嫻姐博揚名

盛傳白鴿黨喺嚟緊嘅區選，或派身兼支聯會常委嘅李耀基去黃大仙挑戰工聯會「票后」陳婉嫻。黨內消息話，李耀基喺明年極有機會接李華明棒，出選立法會九龍東，但據聞死過翻生嘅「維園阿哥」任亮憲亦已磨拳擦掌，準備落去搞一場三人混戰。

喺呢場混戰，嫻姐當然為咗贏，從而參選立法會超級區議會議席；李耀基想提高知名度，而任亮憲就係想李耀基輸，想搞搞震。咁搞法，即係令嫻姐贏得更輕鬆。

據講，任亮憲認為李耀基挑戰嫻姐，本身都唔會有地區工作支持，所以到時泛民嘅選民考慮嘅就只會係政治立場、個人魅力同辯才，佢自信呢幾方面都唔會輸畀對方；而且，若然佢最終得票比李耀基高嘅話，咁唔單止可以令對方黯然無光，佢亦可以藉住追撞嫻姐，提高番自己同人民力量嘅人氣。我哋搵過任亮憲求證，佢就話一切留待人民力量安排，唔會回應傳聞喎！