政情：饒公獲頒星光耀銀河
有「潮州之寶」之稱嘅國學大師饒宗頤，月前獲國際小行星命名委員會頒星，將國際編號10017嘅小行星，正式命名為饒宗頤星。
頒星過程好神秘，饒公事前完全唔知情，該委員會早前喺網上公布消息，饒老嘅細女饒清芬睇到，馬上通知爸爸。饒公開心到笑不攏嘴：「嘩，天上有我粒星喇！」
饒清芬話爸爸生於一九一七年， 咁啱得咁蹺，小行星編號最尾兩個數字亦是「17」。饒老一夜間光耀銀河，饒清芬話起初唔敢相信，直至登入該會網頁見到爸爸個名後，至知自己唔係發夢。佢話一家人好低調，唔會大事慶祝，食餐家常便飯已心滿意足。
