政情：葉澍堃穿膠花冇生疏
馬會尋日喺石硤尾賽馬會創意藝術中心舉行「港文化．港創意」展覽，將反映香港草根實況嘅深水埗傳統文化重現眼前。馬會大董葉澍堃（Stephen）同古物諮詢委員會主席陳智思（Bernard）都嚟湊熱鬧。
Stephen七十年代喺深水埗做過五年民政事務專員，絕對係地膽。會場有人即場示範穿膠花、車布袋，Stephen捲起衫袖試穿，邊穿邊話當年，自爆當年穿膠花幾好搵，夠錢買零食。尋日再次重拾膠花，技巧依然冇生疏。
Bernard執起膠花研究，即場試穿一朵送畀太太。佢又自爆同石硤尾有淵源，童年時愛約三五知己嚟呢度踢波，之後歎支綠寶汽水，認真爽。
葉澍堃（左）細個都試過穿膠花，右為太太Nancy。