政情：爭選委會櫈仔醫生團體混戰

各界都(目及)實年底可以選下屆特首嘅選舉委員會選舉，其中醫學界選委議席由上屆二十席增至三十席，各醫生團體都虎視眈眈，積極部署爭櫈仔，相信又係一場混戰。

據聞骨科名醫兼防癌會主席高永文會率先同六位城中名醫埋班，合組「七君子」名單。名單中粒粒皆星，除高醫生外，仲有人稱「朱大腸」嘅外科專科醫生朱建華，前律政司司長梁愛詩患腸癌都係搵佢操刀，另外仲有瑪嘉烈醫院兒科顧問醫生周鎮邦等。

外界一度盛傳高醫生係疑似特首候選人梁振英嘅智囊，當事人即刻否認，話無意從政，寧願做義工幫人，據知佢已向一班兄弟表明自己冇既定立場。「七君子」希望先爭取入選委會，之後至諗投票畀邊位特首候選人。

但「七君子」要突圍而出，仲要問過擁私家醫生票倉嘅醫學會，佢哋上屆選舉成功奪得十席，今次決定派出三十人參選。會長蔡堅明言要爭取最多議席，增加醫學界嘅牙力。近年公立醫院怨氣爆燈，所以佢已去信兩大公院醫生組織，邀請佢哋合組名單。蔡醫生透露，已經約咗其中一位疑似特首候選人范徐麗泰聽晚食飯，之後會約見埋另外兩位疑似候選人。

年輕醫生成奇兵

公院勢力方面，公共醫療醫生協會（PDA）前會長何栢良話初步計劃派十人參選，相信現任會長蘇潔瑩同副會長都走唔甩，至於佢選唔選就仲考慮緊。對於醫學會拋出橄欖枝，何醫生話PDA會集中爭取改善醫生待遇等，未必樣樣嘢都同醫學會夾得埋。言下之意，似乎傾向各自派人拗手瓜多啲。

大家亦千祈唔好忽略另一路奇兵，就係今年初屯門醫院爆出內科醫生人手荒、當時代一眾同袍出頭嘅一班年輕醫生。部分人近日加入前線醫生聯盟（FDU），主席蕭旭亮話有六至七位兄弟有意出選，但未必會高調爭取合理工時，因為選特首始終係向全港市民負責，唔想下下都淨係講業界利益，初步傾向以改革醫管局為聯合政綱，如果順利當選，就睇吓各特首候選人喺呢方面嘅表態嘞！