短打長擊：鬍鬚曾最叻貪天之功

財爺鬍鬚曾炮製史上最廢預算案之後，派六千蚊又派到藏頭縮尾，市民等到頸都長，隨着通脹飆升，六千蚊又縮咗一截，低下階層等佢救命就苦過弟弟。

政府日前鬼祟推出派錢網頁，卻被傳媒踢爆熱線無人接聽，申請表格未能下載。呢個政府至叻就係將行政複雜化，又最鍾意同老人家過唔去，好似要眼矇耳聾嘅老人家打電話預約門診服務卻難關重重，如今派錢又要老人家在八月艷陽天到銀行登記，認真攞命！

通脹肆虐，食肆加價，主婦去到街市莫不叫苦：都唔知點買餸？鬍鬚曾攞唔出實際方法遏抑通脹，只廢噏通脹掛鈎債券（iBond）嘅目的係畀市民多一個抗通脹嘅選擇。

鬍鬚曾辦事能力差劣，卻最鍾意認叻，iBond認購程序剛完畢，佢就第一時間喺網誌自我歌功頌德一番。普通市民或者會畀佢呃到，之不過本報政情版心清眼亮，踢爆佢唔知醜搶功，說是「各同事努力和參與的成果」，隻字唔提「原創者」白鴿黨嘅涂謹申。鬍鬚曾咁鍾意搶鏡，不如拍番套《盜版神偷》或《抽水財爺》，明年愚人節必可順利攞埋「吹水獎」。

也許鬍鬚曾未聽過老子所說的「功成而弗居」，不過，做官嘅不老老實實為百姓，只識貪天之功，一定唔會有好結果。有道是：莫要晒甜蜜，莫要騷幸福。物理學常識告訴我們，曬容易流失水分，而冷藏是保鮮的最佳方法。

鬍鬚曾，民生多艱，不要在冷氣辦公室自吹自擂至最後一分一秒！