SUN世代：走出律師樓 轉行賣童裝

無論是社會地位優越的律師，或是跨國煙草公司的市場部總監，都無法令曾志燿（Timothy）停下腳步。去年五月，他告別了十五年的打工仔生涯，實現創業夢想。他的父親是牙醫，擁有自己的醫務所，父親的朋友也大多私人執業或擁有自己的公司。自幼耳濡目染之下，Timothy仍在讀書階段，已經立志要創業：「一個人打工去到某個階段，好自然想試吓創業。」

今年五月剛剛開幕的童裝服飾店appaman，正是由Timothy及其生意夥伴姜依蘭（Elaine）合力引入香港。Timothy早年在煙草公司任職時，姜依蘭是他的舊同事，兩人合作已久。「Elaine不嬲想做細路仔嘢，我就想做消費性產品，尤其是鍾意做fashion（時裝）。有次傾開呢個牌子，大家都好有興趣，就話不如試吓啦。」

搬搬抬抬都要兼顧

店舖開張初期，公司人手不足十人，凡事都要親力親為，連搬搬抬抬的勞力工作都要兼顧。「童裝店準備開張之前，入咗幾千件衫，當時未將物流工作外判，要自己拆箱、點貨、執貨，再逐一將資料輸入電腦。」店舖完成裝修之後，為盡早開門做生意，兩人都要通宵趕工，「裝修師傅夜晚先交舖，為咗趕第二日開舖，公司所有同事都嚟幫手。我記得Elaine大緊肚仲喺度燙衫，我掛衫又唔叻、燙衫又唔叻，咁咪抹地囉！」

加入「煙仔公司」之前，Timothy的第一份工作，是在全球十大律師行之一的Lovells（現改名為Hogan Lovells）任職，「收入、status（社會地位）都幾唔錯。」○二年，他幾經掙扎之後，決定加入菲利普莫里斯（Philip Morris），理由之一，是想吸收實際營商經驗。「其實我由律師樓走出嚟嘅時候，都好大risk（風險）。當時我已經做咗六、七年律師，再做多幾年，就可以升做partner（合夥人）。」

「創造一個牌子」

去年，Timothy離開工作了七年半的煙草公司。上司雖然極力挽留，但他認為創業時機成熟，決定開展人生新一頁：「我覺得一個人喺外面打工、學嘢，去到某個階段，應該試吓出嚟創業，自己去build up（建立）一啲嘢。」

謀劃了十五年，創業夢終成真，Timothy已制訂全盤發展計劃，打算在兒童消費品市場開拓新天地。

appaman首間店舖開張後，Timothy計劃於十月開新分店，明年再開多一、兩間，同時進軍內地市場，寄望明年或後年在內地開設由自己營運的店舖。「公司規模逐漸擴大之後，可以搵其他品牌返嚟，或者買牌子返嚟，又或者自己創造一個牌子。」

Timothy's Profile

學　　歷：澳洲悉尼大學經濟系學士、法律學士、澳洲新南威爾士法律學院法律文憑、澳洲管理學院（AGSM）工商管理碩士

專業資格：新南威爾士最高法院註冊律師、

　　　香港高等法院註冊律師

婚姻狀況：已婚，育有兩子

興　　趣：高爾夫球