政情：搞搞政：日本「自由」團六議員爭位

前排講過，立法會食物及環境衞生事務委員會應邀去日本訪問，呢個訪問團連主席在內只得三個名額，僧多粥少，結果真係爭崩頭，有六位議員興致勃勃，呢次真係唔知點分好嘞。

由於呢個訪問團由日本外務省主動邀請，所以無論機票、食宿同當地交通嘅使費，統統由日本負責。截至尋日，表明對訪問團有興趣嘅包括委員會主席「肥仔張」張宇人、委員李華明、方剛、李國麟、黃成智、梁家傑同黃毓民，換言之超額三倍。實情訪問團主要去了解吓日本地震後嘅最新情況，地點包括東京同一個日本方面同意下嘅自選地點，全程預計五日，九月二十六號出發。

其實除咗唔使錢之外，呢個團仲有一個「好處」，就係唔准攜眷出席，換言之已婚嘅議員去到日本，可以回復「自由身」。不過，依家六個人爭兩個位，到底花落誰家呢？咁就要睇下禮拜一（八月一號）委員會開會傾成點。