政情：麥智信無悔離開友邦

友邦保險聽日公布中期業績，前行政總裁麥智信（Mark Wilson，圖）日前就同外地傳媒講，當年佢真係有向AIG董事會講到明，假如友邦落實賣畀保誠，佢就即刻走人。

點解佢要大力反對賣盤呢？佢話友邦同保誠有各自嘅文化，更係業務上嘅競爭對手，情形就似要將兩支英超宿敵球隊曼聯同曼城合併，對員工好大傷害；最後雖然收購告吹，但一來同聲同氣嘅前AIG主席戈盧布下台，而且AIG嘅行政總裁本穆沙又想「變革」，所以麥智信都要跟住戈盧布請辭。

但話說回來，友邦又搵咗另一個阿Mark──杜嘉祺（Mark Tucker）執掌大權，大家都知杜嘉祺係前保誠行政總裁，唔通佢哋真係唔怕文化衝突？

事隔一年，麥智信話佢冇怪過本穆沙，認為佢喺AIG嘅工作做得好好，只係大家嘅意見唔同，所以佢覺得離開友邦係適合決定，並唔覺得後悔。有口痕友就話，其實本穆沙已經唔再信任麥智信，而麥智信亦對離開相當無奈。