政情：建制派拒再上替補賊船
夕陽政府強推替補機制不得民心，喺強大民意反對下跪低進行諮詢，一直力撐替補機制嘅建制派，慘被政府跣到攤攤腰。
據悉，建仔最近舉行嘅中委會討論過替補機制嘅最新形勢，會上確認要堵塞呢個辭職補選搞變相公投嘅漏洞，但最重要係佢哋會做民調了解市民最接受邊個方案，因為民意會成為佢哋支持邊個方案嘅重要指標之一。咁擺明唔想再同政府成為「有辱無榮」嘅命運共同體，想跳船。
有建仔核心成員話，既然政府之前已錯失咗提出替補機制方案嘅好時機，依家根本唔使咁急去做，如果泛民主派再次辭職補選搞公投，到時市民自然會支持替補機制。另有建制派中人亦唔客氣咁話，太早表態支持邊個方案，容易成為被針對嘅對象，與其將自己放喺火山口，不如謀定而後動好過嘞！