政情：下任商務局長點名唐唐老友

商務及經濟發展局局長呢個位，一向係三煞位，基本上冇人做得耐，不論係馬時亨定係劉吳惠蘭，都係谷到病辭職。

廠商會永遠名譽會長尹德勝非常關心會務，每逢講到商務及經濟發展局時，依然火氣十足。佢尋日話下屆政府組班時，最好搵個真正喺商界出身嘅人做商務局局長，千祈唔好好似呢兩任咁，一個係公務員、一個係律師，根本唔知商界要乜，到最尾只會搞到一鑊泡，要下任執手尾。

佢話金融海嘯時，曾經同劉吳惠蘭交手，但對方唔知中小企嘅慘況，仲不時擺官威，搞到唔少商界一肚氣。而現時嘅蘇錦樑，雖然算係識做人，但做事未見有乜嘢突出，好似競爭法咁，到依家都未見商界好撐佢。

咁究竟邊個人選至合尹德勝心水呢？佢話最佳人選要理解商界，而且係商界出身，佢舉例，現任廠商會會長黃友嘉算係其中一個最佳人選，但又話唔知道對方有冇興趣入熱廚房喎。

黃友嘉年尾將卸任會長一職，過一陣冷河後，明年七月就加入政府做官，時間上夾得啱啱好。而且黃友嘉同政務司司長唐唐相識多年，二人分屬老友，如果唐唐他日成功「上位」，搵自己友做局長亦絕唔出奇。

謀組廠商會鐵三角

尹德勝又話商務局實在太臃腫，下屆政府應該重組商務局，將旅遊、香港電台嗰啲分拆出嚟，只專責商務發展一項。睇嚟佢真心想幫呢個局掃走所有地雷，捧黃友嘉上位喎。

佢講笑咁講，話如果黃友嘉第日做咗局長，廠商會喺立法會嘅代表林大輝就可以試吓由功能組別轉戰直選，咁現任副會長施榮懷就順理成章出任廠商會代表做立法會議員，到時三人就成為廠商會「鐵三角」。呢個如意算盤打唔打得響？大家拭目以待啦！