香港八和會館2011年會員大會暨第35屆理事會選舉尋日舉行，「阿姐」汪明荃尋日以八和會館主席身份參加，仲話願意連任添！佢透露，會館嚟緊有多項大計，其中一項就係一年開夠二百場戲曲表演。
阿姐話，現正申請同油麻地戲曲中心成為合作夥伴，若果申請成功，佢哋將會以統籌角色，協助新人喺該中心演出，佢仲構思：「我建議一年會有二百場（表演），新人要透過不斷演出至有實習機會，我哋仲會同旅發局合作，畀遊客欣賞演出。」
阿姐（左）尋日同梅雪詩（右）等出席會議，並透露有多項大計。
