政情：棠哥頻開腔護嫻姐選超級議席

替補機制爭拗升級，表現出位嘅建制派、專業會議議員梁美芬（鼠王芬）做咗過街老鼠，工聯會其實都係力撐者，身兼行政會議成員嘅工聯會會長鄭耀棠近排仲多次公開高調幫腔添，反而旗下議員就低調得多。據講，棠哥頻頻出面，都係想保護旗下一眾現任議員，尤其係準備參選超級區議會議席嘅陳婉嫻，避免佢哋畀人玩殘。

草根派泛民謀組工黨

棠哥曾話唔會做「變色龍」，但禮拜一下晝，政府宣布押後替補惡法，上晝棠哥出席個記者會已經一百八十度轉軚，呼籲政府押後表決，畀人搶先「倒戈」嘅印象。有政界中人指出，替補爭議愈煲愈大後，之前極為高調嘅嫻姐突然失咗蹤，令傳媒無法直接問佢對替補機制嘅睇法。直至政府宣布跪低押後表決替補法案，嫻姐至現番身，出席前日嘅工聯會食物安全問題記者會，但被問對替補機制嘅睇法，佢就叫記者問棠哥。

點解嫻姐受保護？我哋早前都講過，多名草根派泛民議員，包括職工盟李卓人、街工梁耀忠、公民起動何秀蘭、社總張國柱，以及前公文袋立法會議員張超雄等，正密鑼緊鼓籌組香港工黨，搶嘅正係工聯會嘅勞工基層票，工聯會保護嫻姐，都係唔想撐政府搞到失票啫。