政情：搞搞政：邱騰華訪堆填區交足戲

環境局局長邱騰華尋日充當業餘導遊，帶一班政壇新人去睇環保設施，行程包括環保園同堆填區，不過佢哋此行純粹睇一睇、做吓騷。邱騰華嗌啲青年人去「生活感受」吓，睇佢做堆填區導遊嘅表現，真係比做問責局長成功喎！

推動減廢至係最重要

邱騰華係參加一個電台嘅節目，同班政壇新秀落到新界西最大嘅屯門堆填區參觀，順便幫手做吓解畫，推銷吓環保政策。啲新秀喺現場一睇，聲言感覺好震撼，又驚嘆點解本港可以有咁多垃圾。當然有關方面早已做好事前準備，包括啟動除臭裝置，所以班新秀形容「冇想像中咁臭」，但亦有新秀坦言，大風時都難免聞到陣臭味。

面對青年人嘅驚嘆，邱騰華似乎覺得收到預期效果，落嘴頭美化今次活動，話唔係嚴肅嘅「考察」，而係「生活感受」，最後新秀們總結時只係話今後要盡量減少製造廢物，以免加重堆填區負荷。邱騰華今次推廣公民教育似乎幾成功，但係佢領導嘅環境局點樣推動減廢，甚至解決堆填區飽和問題至係重要㗎嘛，如果唔係，邱騰華諗吓轉行做導遊都唔錯噃！