政情：周澄選中大校評會慘敗

中大校評會尋日投票選出主席同常委，有「民主小女神」之稱嘅中大年輕校友周澄都有參加校評會選舉，期望循此進身校董影響校政。尋日，佢一改平日性感小背心裝束，以密實黑色連身裙、黑框眼鏡嘅斯文look拉票，但最終都係得四百六十三票，大敗畀一千四百零五票嘅資深校友、商人陳志新，無緣進身校董。

拉票期間，陳志新同周澄口舌交鋒，陳志新自詡「實幹、不靠口號」，又話自己意見不空泛；周澄就反駁校內反對聲音唔單止唔空泛，反而可以填補校評會職能。尋日會議都幾混亂，唔少校友就會議程序等問題互相嗆聲，又有校友報警報稱被打，結果原定三個鐘嘅會議開足近五小時。

周澄同拍檔李達寧各自獲得四百票落敗，佢事後話「從來冇諗過會成功」，質疑對手嘅政黨背景有助拉票。會議期間又有校友提案要求中大校方撤回就民主女神像事件嘅政治中立言論，最後獲得過半數票通過，但陳志新就投咗反對票，佢話中大有自己嘅管治方針，難定對錯喎。