政情：傻強廢噏iBond

預算案宣布推出與通脹掛鈎債券（iBond）嘅消息後，事隔約四個月，財經事務及庫務局局長陳家強至公布詳情，尋日佢出席個電台節目推介呢個計劃，即係做推銷員啦，但傻強嘅表現卻係驚死上身，問到政府對未來通脹有乜預測？佢一手推咗畀政府經濟顧問；至於市民買唔買好？佢嘅答案更加兩面三刀。睇嚟，傻強入官場幾年耍太極已經學得好到家！

推波畀政府經濟顧問

iBond對香港人嚟講係新事物，傻強早前舉行記者會公布咗計劃大綱後，好多市民仲係矇查查，尋日佢出席電台節目都被問到iBond，既然個名係同通脹掛鈎嘅債券，大家嘅焦點梗係到底呢種債券可唔可以抗到通脹啦，不過聽完傻強解畫，你想知道呢個答案都好難。

佢話，iBond係畀市民一個將利息同通脹掛鈎嘅投資選擇，市民對未來通脹走向有自己嘅睇法，如果覺得未來通脹高嘅，咁iBond某種程度可以幫助抵銷通脹；但如果覺得唔會高，iBond就未必係你嘅投資選擇。咁未來通脹走勢又點呢？傻強仍然一招推得就推，話政府經濟顧問已經作咗預測，點知跟住又收口。佢講咗咁多，市民攞到幾多訊息？可以話係零，不過就可以睇到佢喺官場浸淫幾載後，太極功力愈嚟愈深厚。

講到呢種債券，投資界都有唔少意見，仲有人覺得難免出現僧多粥少嘅情況，或者係咁，傻強今次做推銷員都放軟手腳啩。其實，香港要發展做金融中心，唔少人都認為應該豐富金融產品，政府發債可算係其中一種刺激，傻強使唔使咁保守呢？