政情：搞搞政：網民攞卡片寸爆蘇錦樑
蘇錦樑「破署」坐正做商務及經濟發展局局長冇耐，就畀安排下周二會喺特首辦社交網站facebook「時事Ｑ＆Ａ」答問環節，同網民交流佢負責嘅競爭法，點知未出師已經畀網民翻舊帳。
醜聞多多嘅佢，上任之初就爆出騷卡片撻朵風波，試圖逼入境處職員免去佢提交在職證明嘅要求。估唔到網民對呢件事仲記憶猶新，有網民問：「參加有冇卡片派？」亦有網民寸佢話：「第一項係咪規管卡片業？」睇嚟呢單衰嘢可能跟足佢一世，想洗底都難。
其實，「時事Ｑ＆Ａ」答問環節至今只係搞咗兩次，但過去只派出民政事務局副局長許曉暉及教育局副局長陳維安試水溫，今次輪到局長上陣，點知主角係被視為「次貨」局長嘅蘇錦樑。競爭法推出以來備受爭議，唔知啲網民會唔會插到佢遍體鱗傷呢？
設計圖片