政情：集思公益計劃選出230項目

由李嘉誠基金會策劃嘅「Love Ideas, Love HK 集思公益計劃」第二回合，得到超過三十七萬六千多名市民以逾一百萬票，從九百一十五個項目中，選出二百三十個項目。喺第二回合，無論係投票人數或票數都突破咗舊年嘅第一回合。

基金會主席李嘉誠話項目嘅申請者全情投入去策劃及動員拉票，係愛香港愛社區嘅積極人士。佢話申請者不單要構思項目，更要擬定執行細節，定出策略吸引市民注意，然後游說支持同爭取別人嘅投票，整個過程充分體現出愛心民主力量。

獲公眾選出嘅二百三十個項目涵蓋不同範疇，由醫療教育、地區關愛、文化推動以至動物權益都有，呢啲項目將獲得總額超過三千四百萬港元撥款。當中有關青少年教育發展、照顧長者身心健康、傷健人士醫療福利以及社區公益活動尤其得到市民大眾支持。

李嘉誠將額外撥款超過二百三十萬港元，為其深受感動嘅二十個項目給予更大支持，即係一共二百五十個項目將獲合共超過三千六百七十五萬港元的資金。

獲選項目名單已上載到計劃的網站www.loveideas.hk。