政情：龐盧淑燕唔敢叫歌手義演
保良局主席龐盧淑燕前晚出席保良局慈善粵劇晚會「西樓錯夢」，佢話向來喜歡音樂，閒時亦會唱粵曲。提到細仔龐維仁早前添丁，問佢依家係咪弄孫為樂時，佢大呻：「冇呀！好忙，日日都要開會。不過暑假我會抽時間同大仔一家去美國旅行。」咁細仔仲會唔會生？佢話：「會呀！我見佢好積極，我唔會畀壓力佢，我好Open。」提到龐維仁身為金牌大風嘅老闆，問龐太何不叫囝囝公司旗下嘅歌手義演？佢笑言﹕「唔得，唔可以叫人唔搵錢嚟做義工，咁做咪係大石壓死蟹，但我哋畀唔起錢，就算打咗折都畀唔起。」
至於今次有份演出嘅蓋鳴暉就話同保良局合作近二十年，每年都為曲目而頭痛。佢又透露年尾會演出由李居明撰寫嘅粵曲《聊齋》，仲坦言係一大挑戰，並會參考由張國榮演出嘅電影《倩女幽魂》。
龐盧淑燕喜歡音樂，閒時亦會唱粵曲。