政情：六叔六嬸行街大陣仗

TVB副主席兼董事總經理方逸華（六嬸）同已經一百零三歲嘅邵逸夫（六叔）前日下晝七點左右現身中環ifc，佢哋一行五人好有陣勢咁喺商場慢慢行，見六叔坐喺輪椅上，頭戴冷帽，下半身冚住毛氈，所以都幾矚目。大家行咗一陣，就喺商場一間咖啡店嘅梳化坐低休息，嗰時六嬸攞出杯自備嘅雪糕慢慢歎，而其他人就坐喺後面張枱，點咗啲蛋糕同飲品，但係六叔六嬸就冇落柯打叫嘢食，事關六嬸有私伙，佢食完雪糕仲拎咗壺飲品出嚟飲，好滋陰，六叔就冇食嘢。

休息一陣，大家又繼續行街，工人推住六叔行喺前面，但係速度就好慢，方便六嬸喺後面慢慢window shopping。六嬸間間舖頭都望吓，對ARTE嘅珠寶尤其有興趣，企喺門口望咗好耐，售貨員見貴客臨門，馬上走出嚟打招呼同介紹，但六嬸唔知係咪怕六叔等，同售貨員傾咗兩句就算。