政情：街頭戰士鬥出位社民連行埋一邊

七一遊行有近二十二萬人參加，提出政治同民生方面嘅不滿。遊行結束後，人民力量同社民連嘅成員都有好似水銀瀉地咁喺中環堵塞馬路，但觀乎當晚嘅表現就有好大差別。

人民力量基本上係由社民連分裂而成，經過今次考驗，就發現社民連聲勢已減弱，當晚所見佢哋整晚嘅抗爭活動都唔係由黨領導層做主導，反而係由佢哋嘅友好團體、即係一班80後社運青年話事。現場所見，真正屬於社民連嘅成員未必夠一百人，力量同聲勢差咗係不爭嘅事實，如果真係要將社民連同人民力量當晚表現比較嘅話，社民連實在係輸晒。

而喺籌款方面，社民連同樣輸埋。黨主席陶君行透露社民連全日籌到二十幾萬元，至於人民力量方面，發起人黃毓民就話佢哋籌到四十五萬元。各方面都輸畀人民力量，社民連前路真茫茫，睇嚟佢哋真係要諗諗點做，否則喺呢個波濤洶湧嘅政壇，真係好易被淹沒。