政情：支援科研得把口 鬍鬚曾認衰避箭

夕陽政府投放喺創新科技同埋科技研發嘅資源，多年來都係少之有少，成績更加係乏善足陳，財爺鬍鬚曾尋日喺自己網誌「跪低認衰」，話香港投放喺科研嘅開支，只佔本地生產總值一個百分點都冇，落後於鄰近地區。做到連自己都要公開認衰，佢仲開張空頭支票，承諾政府會考慮為創新科技推出更多財政優惠。呢啲優惠，預料都係關卡重重、審批繁複、杯水車薪，以體現曾班子一貫作風。

曾班子投放科研嘅資源少一向為人詬病，呢個問題唔係突然從石頭爆出嚟嘅新鮮事物。呢十年，無論卸咗任或者現任大學校長，全部都曾經發炮炮轟政府忽視科研、創新科技，但政府唔係職業性失聰，就應該係聽到都扮聽唔到，總之意見接受，態度照舊。早排教資會仲將個沿用已久嘅研究用途撥款，大改玩法，將部分撥款要八大院校「爭餐死」先可以攞到錢做研究，呢啲咁嘅手段係幫到科研抑或害咗科研，公眾應該睇得好清楚。

「驕人成就」背後醜事多

點解佢無端端走出嚟認衰？因為佢知道喺今個星期三，立法會將會動議辯論搞個創新及科技局，希望有專責部門統籌同制訂創新科技策略，唔會好似依家無主孤魂咁無人理，到時政府勢必畀班議員鬧爆，佢惟有幫自己解畫先，兼且等啱啱「破署」坐正、出名唔熟書嘅商務及經濟發展局局長蘇錦樑睇住「官方答案」照噏，唔使講錯嘢累街坊。

鬍鬚曾仲話香港近十年已成立應用科技研究院、創新科技署、科學園等，「取得不少驕人成就」，但應科院早年畀審計署揭發「連環糊塗帳」、創新科技署轄下嘅中藥院因為缺乏成效而要遭「殺院」、科學園更曾出現「冇人租」嘅慘況，呢啲盲嘅都曉嘅「驕人成就」，應該列入健力士紀錄大全，以儆效尤！