政情：白富鴻爆童年捱窮歲月
年尾有區議會選舉，唔少政黨同團體都打算推新秀應戰，「燕之家」老闆白富鴻卸任菁英會主席後，積極考慮轉戰政壇，尋日仲上電台節目小試牛刀。不過，佢嘅商人背景卻引嚟一眾參與節目嘅政壇新秀圍攻，搞到佢要自爆細個時捱窮嘅歲月。
白富鴻喺加拿大讀書返港後，曾打過五、六份工，仲做過地產代理，九七金融風暴後輾轉創立燕窩品牌，○三年沙士時一度愁眉苦臉，點知香港吹起保健風，商舖業主又紛紛減租谷起市況，生意額不跌反升，佢至唔使愁。
做生意咁成功，啲新秀難免暗寸佢係商家佬，唔知民間疾苦。白富鴻就話，自己年輕時都捱過窮，當年返佛山家鄉接濟親友，更要着五條褲、八件衫，避過海關打稅。
白富鴻尋日上電台節目單挑一班政壇新秀。 （資料圖片）