政情：搞搞政：甘威克勤仔英文水鬥水
香港大學生成日畀人笑英文水平差，立法會議員一樣有呢個壓力，建仔新星陳克勤就因為當選後一句「搓 our breast」成為笑話。最近我哋聽到單消息，至知低處未算低，事關白鴿黨嘅甘乃威被指仲渣過克勤仔，呢次真係海軍鬥水兵，唔知邊個水啲囉！
五月底，波蘭國會議員訪港，立法會派出幾位議員招呼呢班貴賓。雙方開會時，都講到替補機制，克勤仔口窒窒用英語力撐未修訂前嘅建議，點知畀班波蘭國會議員反駁話民主係無價嘅。點都好，當日總結係克勤仔講嘅英文原來唔算差。
事關與會人士爆料，話甘威嘅英文仲渣過克勤仔，又話佢從來都唔敢公開講英文喎。其實，甘威身為港島區立法會議員，英文水平同選民多屬中產嘅地區特色真係有啲落差，睇嚟，甘威對人有好感之外，仲應該對英文有好感，惡補吓好噃！
