政情:蘇錦樑報資產「一窮二白」

升正做商務及經濟發展局局長之後,蘇錦樑亦進身成為行政會議官守成員,依例須公開個人利益申報資料。近日,佢嘅利益申報公布咗,原來佢名下只得一個喺中西區嘅自住單位,另外有一間用作持有物業嘅公司,資產比起其他問責局長嚟講,可以話係「一窮二白」。

至於其他利益方面,蘇錦樑就申報咗佢擔任緊應科院公司法團董事、馬會會員、建仔成員同智經之友會員。佢利益轇轕少,唔多唔少都係好事,事關佢上任副局長冇耐就爆單卡片風波,足見政治敏感度低,少啲利益應該都少啲煩惱同陷阱嘅。

講開呢個官場新丁,我哋尋日收到一位讀者來函,自稱之前曾經同因病辭職嘅前商務及經濟發展局局長劉吳惠蘭傾談過,話佢其實私下都好不滿蘇錦樑,相信政府搵佢接任只係「冇選擇嘅選擇」。呢位讀者仲幫呢個夕陽政府諗埋政治危機管理,建議政府喺未來一年將蘇錦樑困實喺辦公室,唔好畀佢周圍走再次闖禍,等政府換屆時即刻踢佢走。

「Money18免費即秒股票報價網站」現推出8升級功能,財經資訊,實時實發!