政情：食力簡收火籲以和為貴
新界村屋僭建問題，搞到發展局同鄉議局撐到行一行，鄉議局仲打算告上法庭添，情況同當年嘅雙村長制爭拗有得揮。當年嘅風頭躉、冠軍練馬師「食力簡」簡炳墀講到今次件事時，明顯收晒火，話自己年紀大喇，暗示唔會好似當年咁激，希望件事以和為貴。
一向牙擦嘅食力簡話，凡事以和為貴好啲，唔希望村屋僭建問題搞到針鋒相對。佢又自嘲年紀大，再唔能夠好似當年咁事事撐到行，言下之意，即係收晒火啫。同「新界王」劉皇發日前嘅說話好相似，大家都謙稱人老咗、冇咁大火。
講開僭建，早前食力簡間大宅都被指霸佔萬呎官地，佢日前現身馬場時卻表現風騷，話會循法律途徑解決，聽落似乎胸有成竹。
食力簡望僭建風暴以和為貴收場。