政情:黨派爭抽水焗早建居屋

樓價急升,市民苦於上車無路,煲呔曾政府雖認衰考慮復建居屋,但煲呔曾卻一心攬到十月施政報告至公布,企圖將復建居屋私有化當做自己嘅政績。佢雖然有如意算盤,立法會幾大政黨同團體卻唔會畀佢打得響,事關嚟緊一個禮拜,復建居屋之聲不絕,先有工聯會掌舵人鄭耀棠聽日出招,開記者會公布研究報告;跟住有公文袋黨魁梁家傑禮拜三喺立法會提動議辯論,促請政府唔好等到十月至傾復建居屋……總之大家都爭住抽水啦!

京官訪港促成港府喺復建居屋問題上轉軚,偏偏煲呔曾跌落地都要渣沙,希望喺十月施政報告至公布恢復興建居屋,仲由房屋署放風話居屋要七年至起好,一於拖得就拖。

攬到十月攞彩太天真

民間對復建居屋卻高度關注,身兼行會成員嘅棠哥聽日就會聯同理事長吳秋北一齊見記者,公布佢哋嘅一項房屋政策研究,其中包括兩年上公屋同早日復建居屋嘅觀點。袋巾傑都唔執輸,嚟緊禮拜三就會喺立法會提動議,要求政府唔好等到十月至傾復建居屋,又建議將置安心資助房屋計劃嘅土地轉為興建居屋,希望首批居屋可以喺二○一四年落成,即係最快三年後,比政府嘅七年計劃快得多。

佢哋兩個夾擊之外,富貴黨主席劉健儀聽日都會同發展局局長林鄭月娥會面,到時仲有榮譽主席田北俊參加,佢哋討論嘅問題雖然係畀首次置業港人購買嘅限呎盤,但涉及樓市嘅政策,議題又點少得居屋呢?咁多政黨高層齊齊出手,煲呔曾仲想將居屋問題攬到十月攞彩,真係唔知係癡心妄想,定係太天真呢?

其實,城中對復建居屋嘅呼聲真係好強烈,亞洲金融集團董事長陳有慶話,復建居屋可以幫助有需要嘅人;廣東社團總會主席王國強亦認為一定要復建居屋,並要盡快解決民生問題。

「Money18免費即秒股票報價網站」現推出8升級功能,財經資訊,實時實發!