政情：馬鴻銘叻女入名牌幼園
做家長嘅都希望仔女生性、有成。玩具大王蔡志明千金蔡加敏同佳寧娜飲食集團太子爺馬鴻銘（John）結婚後，已有一女兩子，三歲嘅女兒馬靄翹暑期之後，就會入讀一間名牌幼稚園。阿John對囡囡全憑實力考入學校，無靠任何人事關係，感到好欣慰。
John尋日以廣東社團總會副主席身份入馬場為盃賽打氣，講起一對五個月大孖仔就笑唔停。佢係潮州人，以為佢會重男輕女啦，點知啱啱相反，佢坦言錫大女多過一對孖仔，一見靄翹撒嬌就「投降」。大女咁可愛，佢唔會心思思想追多一個囡囡呢？佢話會尊重老婆大人意見，事關佗B超辛苦喎！