政情：妻兒否決Bunny遊非大計
暑假將至，青年事務委員會主席陳振彬（Bunny）早前已透露想帶老婆同兩個囝囝暢遊非洲，睇吓野生動物，仲一早訂好機票同酒店添，點知呢個大計突然遇阻滯，Bunny尋日不無失望咁話，太太同囝囝知道去非洲要打預防針之後，即刻興致大減，佢正諗緊辦法出動去過非洲嘅朋友游說佢哋。
Bunny話，原本件事進行得好順利，但係去到要打預防針時，問題就嚟喇！太太獲悉打黃熱病預防針可能引起發燒，就堅持唔肯畀兩個囝囝打針，話等兩個囝囝大個啲先去非洲玩喎。兩個年紀仲細嘅囝囝一聽到要打針，自然即時興致大減，支持媽咪過多幾年先出發。依家票數係三比一，Bunny勢孤力弱下好頭痕，但佢話會盡力游說家人，仲約咗曾經去過非洲睇動物嘅朋友今日同兩個囝囝食飯，游說佢哋，希望可以動之以情啦！
陳振彬