政情：搞搞政：發叔食荔枝自嘲冇火氣

政府拋出解決新界村屋僭建方案後，新界王兼鄉議局主席劉皇發畀啲鄉紳批評過分軟弱，冇啲火氣，搞到身兼行會成員嘅發叔好似兩邊唔係人咁，日前，發叔借食荔枝講到火氣，佢一邊話老人家冇晒火氣囉，一邊又話鹽水可以降火，咁到底發叔係打唔着火，定係冇火㗎？

發叔尋日透露，今年暑假會一如往年會湊埋孫仔孫女一齊返惠州歎荔枝，每次起碼食夠一斤先停到口。除咗鍾意食荔枝外，發叔仲話，佢鍾意將荔枝浸酒飲。俗語有話，一粒荔枝三把火，食都咁燥，再飲埋荔枝酒，容乜易流鼻血㗎，發叔唔驚「太火」咩？發叔好幽默話，佢老人家冇火唔怕熱。不過，為免上火，佢每次食親荔枝都會飲鹽水降火，所以食一斤都唔怕熱氣喎。

備受攻擊都可以「玩火」，可見發叔游刃有餘喇，難怪早前過千名鄉民包圍立法會前夕，發叔罕有咁強硬警告政府唔好製造災難性局面，睇嚟，發叔唔係冇火，而係控火有方啫。