政情：CY借孕婦風波寸唐唐
港府推出內地孕婦來港產子名額制後，各方熱烈討論，疑似特首候選人、行政會議召集人梁振英（CY）發表以「入境政策是人口政策的關鍵」為題嘅文章，其中就有大肚婆生仔事關人口政策唔妥嘅言論，係人都知負責人口政策嘅官員係政務司司長唐英年（唐唐），CY呢個睇法係咪暗寸唐唐「交白卷」呢？
CY喺文章指出，內地孕婦來港產子問題，凸顯咗全面制訂同執行人口政策嘅重要性及迫切性，而喺文章嘅最後一段，佢仲一針見血話內地孕婦來港產子嘅人數不斷增加，表面上對醫療服務造成壓力，但實質係人口政策問題。邊個失責？唔使多講喇。
唐唐、CY同樣係疑似特首候選人，CY借勢寸爆對手唐唐可以理解，但CY啱啱先至獲唐唐擔任主席嘅授勳委員會頒授勳章，莫非CY不甘被「河蟹」而收口？