政情：鄭錦鐘拉頭馬贏36萬
暑假到，今個馬季都接近煞科，尋日名人匯聚沙田馬場，因為一日有成三個盃賽，保良局副主席鄭錦鐘（Eric）更拉頭馬，佢好多朋友入場捧場，拉頭馬時有十幾、二十人陪伴，真係開心要大家分享。
Eric嘅愛駒「享耆成」尋日威風跑出，雖然佢話只投注咗一千元，彩金唔算高，但馬匹獎金就高達三十六萬元，算係標番個尾會，不過，最令Eric開心嘅可能係對入場撐佢嘅朋友有個交代，所以佢當晚已約埋幾位好朋友去西九龍環球貿易廣場間「龍璽」酒家，擦一餐當慶祝。
鄭錦鐘（白色外套）成功拉頭馬，四萬咁口同捧場嘅老友逐一握手。