政情：煲呔曾露底想坐多五年

民間人權陣線今年以「曾蔭權下台」作為七．一遊行主題之一，喺老董腳痛下台嘅陰影下，平時掛住養錦鯉為樂、諗住一年後打完份工嘅「煲呔曾」曾蔭權唔驚就假，尋日最後一次主持七．一酒會時，佢竟然大出洋相，將特區成立十四周年錯講成係「十周年」，唔係嘛，時光倒流二○○七年？睇怕係煲呔曾鬼拍後尾枕，將潛藏喺心嘅願望爆出就真，佢咁係想賴死戀棧權位多五年，但香港人就唔想畀佢為呢！

14周年噏錯10周年

○三年有成五十萬人上街，最終搞到老董○五年以腳痛為名下台，當時市民都以為送走「老懵董」一天都光晒，點知呢個世界係「一蟹不如一蟹」，自詡為政治家嘅煲呔曾自○七年坐正後，一直剛愎自用，淨係識得用啲蠶蟲師爺嘅政治化妝術為拙劣施政塗脂抹粉。

要數煲呔曾嘅劣績真係一匹布咁長，全城鬧爆嘅政策多不勝數，個人亦多次爆出醜聞，好似○九年慳電膽計劃疑似益親家風波，甚至係最近違例將半山豪宅圍封僭建事件，佢次次都死撐拒絕認衰，厚顏無恥到唔知自我反省點寫。

尋日舉行七．一升旗禮，儀式前，煲呔曾懶親民咁四周圍同市民握手傾偈，結果吹到頭髮蓬鬆咁出席七．一酒會，致辭時更當住中外傳媒面前，將特區成立十四周年講成係「十周年」，出咗醜都唔即時更正，累香港冇面，不過，貽笑大方之餘，大家亦可睇到佢想賴多五年嘅心。

祝酒之後，煲呔曾好失禮咁大啖狂「隊」香檳，完全唔知自己衰咗。煲呔曾口窒窒亂噏嘢，唔通係任期將滿同感覺到被要求落台嘅壓力？其實佢何苦咁戀棧權位呀，順應民意，知所進退、提早下台返屋企專心養錦鯉、弄孫為樂咪唔使奮鬥囉！